Wednesday, September 27, 2006

ANG AKONG IKAWILI


(Carine Era Mozo Asutilla)

Kung ako kuhaon na
Sa dili madugay
Sa akong pangidaron karon
Wala na ko’y ikamahay

Hingpit ko’ng gimahal
Ang kapikas ko’ng si Rosal
Hangtod sa adlaw
Nga siya mipanaw

Napulo ko’ng anak
Natagaan ko’g kinaadman
Yuta og kabtangan
Sila tanan gibahinan

Apan nasayod ko
Nga ako mawili
Sa mga naandan ko
Sa tibuok ko’ng kinabuhi

Ikawili ko ang pagpamuna
Ang bunsod og mga isda
Ang pagbugsay sa baroto
Kadlawon sa alas singko

Ikawili ko usab
Ang inadlaw ko’ng tagay
Makadyabetes nga Coke
Maka-askil nga Tanduay

Apan wala’y makawili pa
Sa maanindot nga talan-awon
Sa mga apo nga nagduwa
Uban sa tam-is nga katawa

Hugot nilang gakos
Og pagsampit sa akong ngalan
Mga apo ko’ng gimahal
Bahandi ko’ng mabiyaan

No comments: