CELIA part 1

Gipukaw si Celia sa pangagot sa sirotso nga ang mga ngipon mipaod sa usa ka palid sa plywood nga duha ka adlaw nang gihinay-hinayan og tabas ni Arming aron itaplak sa nagisi nang sakyanan panagat. Sa gamay nga kang-a sa ilang bay nga lawanit, makit-an ni Celia ang iyang bana nga nakigkumbati'g tud-bira sa sirotso. Kadlawon pa lang, apan nagdagayday na ang singot ni Arming.

Hinay nga mibangon si Celia sa iyang gihigdaan nga banig. Unya gipilo ang gigamit nga habol ug gibalik sa istante. Iyang gipunit si Evon nga nalagpot duol sa hagdanan sa kalihukan ini matug. Iya kining gitupad ni Coco unya minaog na sa kusina aron initan ug tubig ang iyang bana.

"Cel..." tawag ni Arming. "Palihug ra gud ko anang pintura naa sa ilawom sa lamisa," pamalihug ni Arming samtang nag-epoksi sa katapusang ngilit sa tinapak.
Dali usab kining gilili ni Celia sa ilawom sa ilang lamisa ug gipunit ang labing gamay nga lata sa linya.

"Pinturahan diay na nimo karon? Di ka kapanagat ana..." sulti ni Celia samtang gibutang kiliran sa pandayan ni Arming.
"A! sahi ra ba... bisan pag di ni nako pinturahan ron di gihapon ko kapanagat... natumba tong bunuan sa bunsod, ako pa tong ayuhon," tubag ni Arming nga nagpadayon sa iyang paghikap-hikap sa tinapakan.

Sa tanang pamilya sa baybay sa Lo-oc ang pamilya nila Celia ug Arming ang labing arangan. Sila ra sa ilang barangay ang adunay bunsod, ug sila ra usab ang naay sari-sari store sa baybay. Si Coco ug si Evon ang bunga sa napulo na katuig nilang pagmanagti-ayon. Bisan napulo usab katuig ang diperensya sa edad nila Celia ug Arming, wala maglisod si Celia sa iyang bana tungod kay responsable ug matured ang panghunahuna ini bisan manghod ra niya kini.

"Ming, pangape sa... biyai sa na," pangagda ni Celia sa iyang bana samtang gihuwaran ang duha ka tasa og init nga tubig. Unya mikuha si Celia ug usa ka putos pan nga gibitay sa ilang sari-sari store.

Mibiya si Arming sa iyang gitrabaho ug misulod sa ilang panimalay, milingkod kini ug gihigop ang iyang kape. Gituparan usab ni Celia si Arming. Giuna ni Celia pagkaon ang pan usa kini mihigop sa iyang kape.

"Ayo!!! Ayo!!!" tawag dalang singgit sa silingan nilang Celia nga buot mupalit sa ilang tindahan.
"O! saman!" singgit nga tubag usab ni Celia. "Unsa may imo gud Daday nga kadlawon dako magsinggit-singgit na man ka! Makamata ng bata!" Ug nakamata gyud si Evon, mihilak kini pagkakita niya nga wala sa iyang tupad ang iyang inahan. Dali kining gisaka ni Arming ug gipahilom.

"Hala! Sori... nag dali man gud ko Cel oi... muabot man gud to akong anak karon, gikan Dajanggas uban iyang pangasaw-unon... palit unta ko'g pan ug juice idalit nako unya nila. Unya pautanga pud ko anang imong bihon oi... kay aron bihunan nako tong paliya didto among ipasuwa sa bisita," paspas nga suginlon ni Daday, ang suki nga hingutang sa tindahan nilang Celia.

"Pastilan pud ng paliya bihonan... tinapa kaha bihonan..." suhestyon ni Celia.
"Ada! ayo ng pakan-on na silag paliya aron makamata sa kapait sa ilang sudlan nga kinabuhi," tubag ni Daday. Sukad pa sa sinugdanan, dili ganahan si Daday nga magminyo si Sica, tungod kay gawas sa 23 anyos pa lang si Sica, ang iyang pangasaw-unon, buwag sa unang asawa. Dato hinuon si Albert, siya ang tag-iya sa gasolinahan nga gitrabahuan ni Sica. Apan bisan pag- finacially stable ang pangasaw-unon ni Sica, sakit gihapon sa dughan ni Daday ang desisyon ni Sica nga minyuan si Albert, kay dili ganahan si Daday nga basin sama sa unang asawa ni Albert, biyaan usab ini si Sica.

"Bali pud ka Day oi... pasagdi ra man gud na imong anak, hingkod na bitaw na... unya hayahay man iyang pangasaw-unon, asa pa ka ana, tag-iyahan ug gasolinahan... mura na kag donya ana!" sungog ni Celia.
"Na donyang way nahot!" katawa nga balos ni Daday dayon lakaw.