Celia part 2

Pasado alas onse na sa kaudtuhon. Nag-awas-awas ang sabaw sa utan bisaya. Misinggit si Celia pagtawag kang Coco aron mudali og pahinay sa kayo.

"Pastilan gyud nimo Co, tingpaniudto na nagsige gihapon kag taliding-taliding diha... wa man nimo tan-awa ng mga buhaton sa bay... niawas na ng sabaw! Naa pa ng manghod nimo nagsigeg hilak, wa gyud nimo panumbalinga! Kita kag nagtakos tag tuba dire! Salig ra man untag ikaw mutawo dire sa tindahan!" paspas nga yawyaw ni Celia dala pamundak sa bol sa tuba.

Padayon pagkakha si Coco sa baga, aron muhinay ang kayo ug muundang ang pag-awas sa sabaw. Dayon iyang gipunit si Evon sa gawas ug gidala sa sulod gitungtong sa lamisang kan-anan. Nanghubag na ang mata sa bata og hinilak kay diay, nakatunob og bay sa amigas puwa. Gikakhaan niya kini, ug aron muhunong sa paghilak, iyang gipahuwam ang iyang gipanday nga taliding.

"Wa pay paniudto diha? Gutom na man..." suna ni Arming sa iyang pagsulod sa balay gikan namintura sa iyang baroto. Mibiya sa iyang gibuhat si Celia ug nanghukad. Ginaog ni Coco si Evon og gipalingkod sa iyang kiliran ang iyang manghod.

Hilom nga gisaw-an sa pamilya ang utan bisaya. Gihigop ang sabaw, gitilok ang kamunggay nga mipilit sa ilang kutsara. Ang kahumok sa kalabasa ug sa borot-borot nga nalata og maayo gitulod lamang sa tagsa ka basong tubig.

"Ingon ang ipos-ipos ang mawahi maoy muhipos!" sungog ni Arming kang Coco nga maoy ulahing mibarog sa kan-anan.

"Ah... wa klaro tatay oi... ako ra man kanunay, bantayan gyud na niya... tuyuon ako mawahi, butangan ko daghan luto sa plato unya ipahurot mawahi noon ko... ah... limbungan!" kunot ang agtang nga nireklamo si Coco sa iyang amahan.

"Sus... tabangi ra man gud na imong nanay sa mga buhaton sa bay kay saputon na pud na daghan trabahuon." tubag ni Arming sa iyang anak samtang mihatag kini og sekretong kidhat kang Coco nga nagpasabot nga makadawat siya og piso human sa buhaton.

Mitabang si Celia og pamutang sa mga kinan-an sa banggera unya gibiyaan ang anak aron ipadayon ang pagpanghugas. Patong sa lingkuranan, hinay nga giwas-wasan ni Coco ang mga mumho sa gikan-ang plastik nga plato, gisunod ang kutsara, dayon ang mga plastik usab nga baso.

Mipadayon sa pagpamintura si Arming. Imbis nga ang tinapakan lamang unta ang iyang pinturahan, nakahunahuna kini nga pinturahan na lang ang kinatibuk-an. Puti. Puti ang tibuok nga mahimong dagway sa baroto inig human.

Mipadayon usab sa pagpanakos og tuba si Celia. Nagpuk-ong ubos sa screen sa ilang tindahan samtang si Evon naggunit sa abaga ni Celia, ang pikas kamot ni Evon nagmaneho sa iyang taliding.

Gisala ni Celia ang lima ka galong tuba, gibalhin sa mga bildong galonan. Ang mga ginalon nga tuba ang labing halin sa ilang tindahan. Sayo pa lang sa buntag mao na kini ang pangitaon sa mga kalakin-an usa manubid ug human manubid.

"Ayo, ayo!" kalit nga tawag sa usa ka-lawom nga tingog nga milusot sa screen sa tindahan. Nakuratan si Celia ug nahaw-as sa imbudo ang pipila ka-tulo sa tuba nga iyang gitakos. Daling gisuyop usab kini sa yuta.

"Ay kabayo!" kalit nga nabuhiang mga pulong ni Celia tungod sa kakurat.