SA KALDERONG KULOB

(Carine Era Mozo Asutilla)

Layo ang gi-abtan
Sa panan-aw
Sa bata’ng babaye
Sa bintana
Ganiha ra nagtungaw
Ang tiyabaw
Sa bata’ng lalake
Sa lamisa
Wala’y sama kakusog
Kalit muhinay
Ang bata’ng gamay
Sa duyan
Gitabyog sa inahan
Nga naglubog
Sa kawaya’ng salog
Samtang makabungog
Ang liti’g dugdog
Sa gawas
Uban sa hangin
Og ulan
Apan ang amahan
Padayon nagbadbad
Sa pisi’ng gihikot
Sa baroto
Aron sa paglawod
Bisa’g bawod
Mamasin lang gihapon
Iyawat masudlan
Ang kaldero’ng nagkulob
Sukad gahapon