Ikatulo na ka

(Carine Era M. Asutilla)

Pataod-taod pa kunuhay ka

Og pulseras sa akong bukton

Sus ganahan ra sab ko

Kay lage, ambungan ka

Og sa tinuod lang,

Ikaw ang labing ambungan

Nga nakauban ko’g panihapon.

Humuka ra sab sa akong ilong oi...

Nisugot man dayon ko...

Nga magsawo ta og kaon.

Usa ka adlaw ug usa ka kagabii ra ta

Nga nagtextanay ug nagtawaganay.

Gidani ra man ko nimo

Sa imong pasalubong

Nga mga burloloy

Mao nga nitunga gyud ko

Sa imong imbistasyon

Nga panihapon.

Gipakita mo pa ang mga hulagway

Sa lugar nga imong gibisita

Diin gilaay ka kay wa kay kaistorya

Ug kanako ni-text ug tawag ka.

Unya human sa kaon

Gihagit pa ko nimo

Nga mutan-aw og sine...

Sugot ra sab ko,

Kana pa, libre.

Pwerte gyud nakong lingawa

Lami pa ang salida

Mas lami pa gyud ka

Susama sa usa ka pongpong

Sa gumamela nga puwa

Way baho, apan makaako gihapon ka

Ug halad ini sa mga santo

Matag flores de mayo.

Unya paghuman sa salida

Ingon ka nalingaw ka

Ingon sad ko nalingaw ko.

Ingon ka lahi ko sa uban na nimong nakuyog

Nibagtik gyud akong dunggan dong!

Ay sus!

Buwakon, tikalon ra gyud mo

Ikaw na gyud ang ikatulo...

If I know, biyaan ra sab ko nimo.