HABWA 4

Ingon bitaw ko nga muuli na lage ko og sayo... dili na maghapit-hapit, dili na magpangitngit... kay unta bisan lang unta sa panihapon magkauban mi og kaon sa akong igsoon...
Karon, dako kaayo ko og pagmahay ug niaabot na sa langit ang akong panumpa nga magtarong, magbinuutan, magpakabana.
Kay bisan unsaon og kwenta... maguwang ko. Kinahanglan ko masayod nga naa ko'y igsoon intawn nga nahilayo sa ginikanan sa sayong panuigon, ug ako lang gyud intawn unta ang iyang madali-dali og tawag sa tunga-tunga ning syudad.
Wa na!!! Si yen yen... lagmit mabuang sa dihang nasayran nga na- dengue si Loui... di maihap kung kapila nakapanguros ug nakasampit sa Ginoo... da! lage!
Kay kung nisayo pa unta ko og uli sa Huwebes sa gabii nadalian unta to... wa na unta mi nakapuyo pa sa hospital og lima kaadlaw... wala na unta nagkarag-karag si nanay pag-ari sa Cebu samtang naghilak... kay lage... dili na niya makaya pa nga mawad-an og anak... kay pareho nga sakit ang nakabugto sa ginhawa sa akong kwatro anyos nga manghod sa grade six pa ko.
Misamot ko og katambling sa dihang naghilak og maayo akong inahan nga nag-gakos gakos sa akong manghod nga gitauran na og dextrose. Murag ganahan ko nga suyupon na lang ko sa yuta aron dili na nako masaksihan ang maong panagkita.

Nakasuway na gyud ko nga nakapara ug nakasakay sa dili maong jeep.
Wala na ko nakabantay, nagbalik balik na diay ko saka-kanaog sa hagdanan sa dakong hospital.
Nabuang gyud ko kadali.

Pinangga gihapon ko sa Ginoo bisan unsaon og kwenta, kay gidungog niya akong pag-ampo... Kalooy sa Diyos nakagawas na gyud sa hospital akong manghod. Ug karon... nabulit lagi ko sa panaad nga dili na ko magsige og yawyaw niya, dili na ko mag sige og sugo sugo bahalag magkina-unsa, dili na ko magkanunay sa pag-uli og dugay aron magkauban mi ug masusi nako siya sa iyang mga panginahanglan. Ako na gyu'ng i-career ang pagka-ate.