Wednesday, September 27, 2006

Habwa 2

Unsa man? Sige… wad-a na lang ko sa imong kinabuhi. Mao man sad siguro nay labing maayo nga buhaton. Di man ka magpahilabot. Matod pa nimo, gikapoy na ka sa akong mga sugo.Tingali gyud diay sige ra ko og sugo-sugo nimo, pahugas sa plato, palit sud-an ug kan-on, pagbutang tubig sa ref, ug usahay palit load didto sa atbang. Lagi diay, bug-at man diay imong trabaho kada uli sa eskwela no? Pasayloa ko ha, wa man gud ko kahibalo nga kapoy diay imong adlaw… mas kapoy pa sa akoa di ba? Sorry ha…Peste ka!Kinsa may mas kapoy nato diay beh? Unsa man magkwentahay ta?Inig buntag, samtang magligid-ligid pa ka sa imong katre, ako mata na, nakaligo na, nakailis na, naka-andam na sa akong dad-unon sa trabaho. Na-arrange na nako ang akong gihigdaan, gani makapanilhig pa ko ug makapanarapo.
Inig abot nako sa trabaho-an, maproblema pa man gani ko kung asa nako ibutang ang akong kaugalingon. Mabwesit pa ko usahay labi na kung makahuna-huna ko nga sa akong trabaho karun, gika-on na nako ang akong pride, ang akong kinatibuk-an. Nabutang ko aning kalibutana karun tungod kay mao ni ilang ganahan. Kabalo ko mao ni makapalipay nila, sa atong mga ginikanan. Sukad pagbata, makakita ko ug makabantay kung unsay ilang ganahan nga maabtan nako. Kining tanan, ilaha, ilaha, ilaha… ang ako na lang gyud ihinaot nga muabot ang panahon nga mabutang na gyud nako ang akong kaugalingon sa ilang pangandoy. Ilang pangandoy nga ma-akong pangandoy na sad.Matag adlaw, mahubog ko sa asu sa sakyanan sa dalan, ug sa mga bugal-bugal sa mga tawo nga walay lingaw. Mga driver sa jeep nga hunungan ko bisan dili ko mupara, mga habal-habal driver sad nga magsige lang og tingsi kusog pa gyud magpadagan murag dili baho’g singot ang ilang mga t-shirt. Naa sa’y uban nga naa untay grado, pero kung mangutana ko tagaan ra ko ug lagpas nga tubag gawas sa “ambot” ug “wala ko kahibalo.”Peste mo!Inig uli nako sa balay, usahay wala pa ka, pero kanunay nga naa ka, mauna pa nako.
Maabtan lang ta ka nga maglimpungad atubangan sa TV, usahay magligad-ligad nagpaminaw sa radyo sa imong cellphone nga nindot kaayo ikumpara sa akoa. Malipay na lang ko kung makit-an nako nga nakaluto na ka og kan-on sa rice cooker, kana dili na ka nako yawyawan. Pero kanunay man gyud nga maabtan ka nako nga wala gyu’y agi. Dili mahugasan ang mga plato sa planggana, giamigas na lang. Ang salog, nagbalas na lang, kay wala’y silhig. Ang ref, wala’y tubig nga gipabugnaw. Magbuwa-buwa gyud ang akong baba ana. Ikaw, magkusmuod lang ug magyawyaw nga ikaw ra say makadungog. Labaw makapa-init nako, kay kung naa gud unta kay ganahan isulti nako, nganong kinahanglan pa man nimo hinayan ang imong tingog nga ikaw ra say makadungog?Kung suguon na ka nako sa paglihok, tagaan ra ko nimo og “unya ra.”Ok ra kaha sad nimo kung ingnon ka nako og “unya ra” kung magpagama ka sa imong project? Kung magpatudlo ka sa imong assignment? Kung mangayo ka og allowance? Kung magpa-attend ka nako sa PTA meeting?Karon, sulti-i kuno ko… unsa man? Wala diay nabahin og maayo sa Ginoo tanan nga kakapoy?Tingali gyud diay mas kapoy ka… hala kuno beh, ako kunong huna-hunaon kung unsa kaha sad ang imong adlaw…
Mumata ka inig kabuntag, maligo, mag-ilis, usahay mamalantsa sa imong uniform, dayon mulakaw. Wala kay pamahaw mulakaw adto sa eskwelahan, kay wala man sad ta maanad mamahaw, makapamahaw lang ta og pugos kung muuli ta sa Bohol kay mangluod man si nanay kung dili ta mukaon.Tungod kay wala kay pamahaw, inig abot nimo sa klase, dili ka makasabot og maayo sa leksyon, makahuna-huna tingali sad ka ug maproblema nga basin maka-summer na sad ka kay dili ka makapasar sa halos tunga sa mga subjects nga imong gikuha. Kahibalo ko nga maulaw sad ka ana sa atong mga ginikanan ug maglagot sad kay ikumpara man dayon ka nila sa akoa. Kay mas maayo man lagi kuno ko sa eskwela.
Imong mga kauban ang imong mga classmates inig pani-udto, kung naa pa moy oras, (manghinaot na lang gyud ko nga dili ka mag-cutting sa imong klase) mangadto mo sa mga nagpalibot nga internet cafes sa eskwelahan ninyo, magdula o kaha mutan-aw lang kay wala nay kwarta ikadula. Mabwesit ka ana kay ako man gi-cut imong allowance.Sauna, kada-hapon ka magdula, madugay ka og uli, karun nga ako gikuhaan ang imong bawon kada adlaw, mas nisayo-sayo na ka og uli.Human sa imong eskwela, muuli ka sa balay og ana na ta magkita. Ayo na lang kung maka-uli ko og sayo, kay usahay ra ba maabtan ko og alas dose sa gawas, inig abot nako, tulog na ka. Ug maproblema dayon ko kay basin unya’g nakatulog ka nga wala’y panihapon, kay maghulat pa ra ba ka nga akong ingnon og kaon og panihapon.
Gikapoy na man ko. Gikapoy na ko nimo nga kung mag-away ta, muhilak lang ko. Ako bitaw to gitextan si nanay nga dili na ko nimo, nga maglain na ko, nga bahala na sila nimo, bahala na sad ko nako. Total ingon man sad ka nga ok ra ka nga ikaw ra, ok ra ka nga wala ko, mas ganahan ka nga wala ko. Sige, mag “ija-ija, ahu-ahu” na lang ta ani?Kahibalo ko nga muingon si nanay nga sabton ka nako kay manghod ta ka, maguwang ko, ako ang magpa-ilob. Mag-sige na lang? kapoy sad oi… ikaw man sad siguro angay sad nga musabot nako kay naa na man sad kay buot.
O, sige na, masugu-an ka nako permi, kay ngano? Kung wala ba koy laing gibuhat, dili ba ko mulihok para nimo? Para nako? Sumala gud, kung dili ko musulod sa trabaho, kinsa may mulihok sa tanang lihukon? Di ba ako?Kasabot ka sa dagan di ba? Kahibalo ko kasabot ka sa mga pama-agi sa atong pamuyo. Kita-kita ra dire sa syudad oi… kinahanglan sad ta magtinabangay, pero ikaw, kung feel na gyud nimo nga mas maayo ka nga ikaw ra… cge go, why not di ba?So, unsa man ni? Mag-iyahay na ta? Ka-antigo na man kaha ka mu-alima sa imong kaugalingon? Mao bitaw na imong gipasigarbo sa akoa.

No comments: