Habwa 3

Direng bahina sa kalibutan, padung na mupiyong ang akong mata ug mulupad akong utok sa iyang kaugalingong katre aron sad magpahuway. Unya… sa ubos-ubos nga dapit aning nasud, sa pareho gihapong kalibutan, naay usa ka laki nga nikalit lang og text.Kinsa man say dili makuratan oi nga level 5 man akong message alert. Syempre, nakuratan intawon ko, mura ba’g nabubu-an ko og tubig nga init.

Unang text niya nanginahanglan kuno siya og tabang, nireply na lang sad ko nga ok ra basta kay dili mahitungod sa math, kwarta, og uyab-uyab. Text sad dayon siya nga something emotional lage daw. Tubag sad ko nga nanusi kung bahin ba sa eskwela, ginikanan, ug uyab ang iyang problema (kay mao man gyud na ang iyang permi problemahon). Text sad siya nga ang tulo kuno.

Ni-istorya siya sa dili detalyado nga paagi (ing-ana man gyud ng mga lalaki, dili gyud na detalyado mu-istorya, diretso diretso man ng ila). Kung akong i-fastforward ang nahitabong textanay, ang istorya nagdagan ra nga siya wala na tagda sa iyang uyab unya nagbuwag sila. Sarcastic dayon ko nga nagbalos-balos sa iya og text. Ako siya giingnan nga naniguwang na lang siya og uyab-uyab wa gihapon siya nakat-on. Nga karma ra na sa tanan niyang gibuhat nako ug sa uban pa nga nangagi. Nga iya ng binuhatan ang gibuhat sa babaye niya karon, dapat kahibalo siya unsaon paglusot ana.

Positibo man sad siya og reply, nagpasalamat pa man gani nga naminaw kuno ko niya. Pero kahibalo ko nga nakabantay gyud siya sa tono sa akong mga text nga mura ba’g namikat niya ug namirisi niya.

Unya? Ngano man diay kung nagbuwag na mo? Unsa may labot nako ana? Abi nimo malipay ko? Abi nimo naa nay bili nako? Sus dong! Ayaw ko’g labda!Humana ta oi… wala nay sequel sa atong istorya. Wala nay part 2. Wala na koy plano mu-produce ug salida kauban nimo.

Pero karung higayuna, ganahan lang gyud ko magyawyaw mahitungod niini.Nakabantay man ko sa pattern sa imong pagtext, ug ako na man sad gipangandaman ning higayuna. Kahibalo man ko muabot ni. Niabot gyud, sayo kaayo.

Ganahan lang gyud nako i-klaro ang tanan. OK ra ko. Kaayo. Wala’y fireworks effect ang imong gi- “anyway” nga part sa text message bahin sa inyong break-up. Kay wala naman gyud koy bisan usa ka badlis sa tatak sa gugma diha kanimo nga nahibilin sa akong kasingkasing.

Lawom no? Why not? Ing-ana man sad kalawom ang akong gikubkob aron lubngan sa tanan mahitungod kanimo. Plus, ako pa gyud gipatungan og kahoy ang ibabaw. Pagkahuman akong gipakabilyahan sa wala pa nako gipasemento. Hala kuno beh… sulayi kuno og kawot kung kaya pa ba kawton.

Ayaw kog labda! Ika-tug ran a… If I know, sa mga sumusunod nga adlaw makakita na sad ka og laing taas buhok.